فيس بوك 11

فيس بوك - 11

تخاريف ما بعد الواحدة صباحا

على قد التكنولوجيا ما بتتقدم

على قد أخطائها ما بتعطل وربما بتشل

وفي النهاية كله يخلص في ميعاده

سبحان الله

في المساحة اشتغلت بالجنزير والسكستان والثيودليت والدستومات والتوتال ستيشن والــــ.............

 وفي الحساب والهندسة اشتغلنا يدوي والمسطرة المنزلقة Slide Role - والكالكليتور والكمبيوتر

وعلى رأي أستاذي في الخرسانة المسلحة الدكتور جعفر رحمه الله
1975 : مسطرة حاسبة إيه اللي بتستخدمها يامجدي حطها على جنب 253 * 14 = 3542

1976 : تمر الأيام وأشتري آلة حاسبة

ويسألني د جعفر : يا قرقر يا ابني: انت مش كان عندك مسطرة حاسبة طب ما تجيبها لي
1980: جبت النتائج دي منين يامجدي؟
أجيبه من الكمبيوتر يادكتور

كمبيوتر إيه يا ابني؟

أنا عارف انت أكلته إيه الصبح؟ لو أكلته فول حايطلع فول ولو أكلته بقلاوة حايطلع بقلاوة

الله يرحم الجميع

الدكتور جعفر والوالد أبو خط جميل أحسن من خط الكمبيوتر

والله يرحم الجنزير والسكستان والمسطرة حرف تي ويرحم السلايد رول والكلكليتور والكمبيوتر والفيس بوك كمان اللي ضيع وقتنا في كلام لا يودي ولا يجيب

*****

على رأي عبد المنعم مدبولي
زمان وكان يا ما كان
كان الزمان إنسان
دلوقتي ليه يا زمان مبقتش زي زمان
طيب يا صبر طيب
يرحم زمان وليالي زمان
والناس يا متهني يا فرحان
الدنيا كانت وردة وشمعه ولسه مخترعوش أحزان
ساعات الّف أزف عرايس وساعات ادور مع نور عرسان
وياما كان بيجيني مزاج السوع العزال كرباج
ولما أقول شي الزفة تمشي
ولما أقول هٍس كله سمع هًس ودُقي يا مزيكا
صدقني يا صاحبي كان الزمان صاحبي
أيام مـ كان إنسان
طيب يا صبر طيب
صدقني يا صاحبي
********

أ محمد هلال فاكر صفحات الزنك في مطبعة الأهرام
أ حنان - م شيماء
على ذكر الآلة الحاسبة والجمع والطرح
كنت في اليابان عام 1979
وكنا لسه محدثين آلة حاسبة
واليابانيين مخضرمين
والمحاضر الياباني بيحل معانا تمرين
wait a moment 5*6
ويروح مطلع الكلكليتور من جيبه ........... هيه 30
هل بقينا النهاردة زي اليابان 79
أرجع لقريتي بميت غمر دقهلية عام 1958 تانية ابتدائي
ومدرسي "سعيد جزرة" الله يرحمه حيا كان أو ميتا .. يسألني في حوش المدرس 5*6 كام يامجدي
وأعبث بأصابعي الصغيرة ضما وفتحا ولا تسعفني أصابعي بالإجابة
يقول لي : حاسهلها عليك ..... شادية بتقول إيه 5*6
وأصيح فرحا بمساعدة المدرس الصديق 30 يوم يا أستاذ
ولا صديقي عبد المجيد في المسجد بعد الصلاة : أقول لك أنا اتعلمت أسبح عل صوابعي 33 ازاي
قول يا عبد المجيد
ويظل علام عبد المجيد حتى الآن وأصبح طبيبا نابها الآن ولعله نسي درس المسجد الذي علمني إياه

*****

إيه رأيكم نصوم عن التكنولوجيا شهر في السنة ونرجع للطبيعة
وإن ما أمكنش يبقى يوم ولا يومين في الأسبوع
الاتنين والخميس صوم عن الأكل
والثلاثاء والأربعاء صوم عن التكنولوجيا
والجمعة صوم عن أخبار د مرسي
سامحني يا دكتور مرسي انت حبيبي بس النكتة حبكت
حاقولها ولو على نفسي

18 أكتوبر 2012

**********